საშოში არსებული ბაქტერიების ნორმალური თანაფარდობის დარღვევის შემთხვევაში ვითარდება საშოს დისბიოზი ანუ ბაქტერიული ვაგინოზი. ეს არის ინფექციური, არაანთებითი ხასიათის კლინიკური სინდრომი, რომელიც ხასიათდება “მეგობარი ბაქტერიების” - ლაქტობაქტერიების სრული გაქრობითა ან რაოდენობის მკვეთრი შემცირებით და მათი ჩანაცვლებით პათოგენური ანუ დაავადების გამომწვევი მიკროორგანიზმებით. ბაქტერიული ვაგინოზი საშოს ხშირი ინფექციური პათოლოგიაა, რომელიც აღენიშნება გამრავლების უნარის მქონე ქალების 33 - 35% და არ მიეკუთვნება სქესობრივი გზით გადამდებ დაავადებათა რიცხვს.
ბაქტერიული ვაგინოზის დროს ძირითად ჩივილს წარმოადგენს საშოდან უხვი, ერთგვაროვანი, წებოვანი, კრემისმაგვარი რუხი ფერის გამონადენის არსებობა, რომელსაც გააჩნია უსიამოვნო, “გაფუჭებული თევზის” სუნი. შესაძლებელია არსებობდეს ქავილი, წვა საშოს არეში, დისკომფორტი სქესობრივი აქტის დროს.
|